Wednesday, December 16, 2009

Suna hay....

Suna hay laut'tay ho tum,

Mairi viraan nagri may,

Phir say ghar bananay ko,

Yeh ujra dil basanay ko,

Kisi guzray hoey kal ka,

koi wada nibhanay ko,

Mairay la-char zakhmo'n pay,

Koi marham laganay ko,

Sab hee khoi hoi khushiya'n,

Mujhay phir say lutanay ko,

Maira jeevan sajanay ko,

Mairay charo'n taraf her su,

Wafa k gul khilanay ko,

Suna hay laut'tay ho tum,

Mager theyhro,

Wahee'n thayhro,

Zra yeh to batao tum,

Achanak itnay barso'n may.

Tumhai'n yeh kyu'n guma'n aaya.?

Kyu'n kar is taraf aakhir,


Suna hay....

Tumhara bhi dayha'n aaya,

Achanak kya tumhai'n soojhi.?

Mairi dunya basanay ki,

Maira jeevan sajanay ki.?

Kya tum ko ab bhi lagta hay,

Tumhari aahatai'n phir,

Dharrkano'n ko jaan bakhshai'n gi,

Tumhari dastako'n pay kaan yeh,

Ab bhi dharay ho'n gay.?

Mairi aankhai'n,

Tumharay lautnay ki muntazir ho'n gi.?

Nahee'n aisa nahee'n,

Hargiz nahee'n,

Aisa nahee'n hay ab,

Ghalat tum jaan baithay ho,

Maira jeevan basanay ki,


Suna hay....

Anokhi thaan baithay ho,

Tumhari khush-gumani hay,

K ab bhi muntazir hoo'n mai'n,

Aur tumharay laut aanay per,

Nazar-andaz kar k mai'n,

Purani sari baato'n ko,

Wafa k deep rakh k mai'n,

Tumhari sari raho'n ko,

Phir say jagmag doo'n ga,

Kuchal kar raund kar,

Mai'n umr-bhar ki sari yado'n ko,

Tumhai'n dil may jaga doo'n gi,

Magar hergiz nahee'n aisa,

Bohot arsa hua,

Kuch is tarah say ho gaya jeevan,

Na kisi ki yaad ki dastak pay,

Yeh aankhai'n bhatakti hai'n,


Suna hay....

Na aahat dharrkano'n ko,

Ab mairi bay-chain karti hay,

Woh jitni shiddatai'n aur khuwahishai'n,

Dil may panapti thee'n,

Unhai'n aik aik kar k,

Dil say mai'n nay nauch dala hay,

Tamannaey'n jo palti thee'n,

Tumharay laut aanay ki,

Unhai'n usi jaga mai'n nay,

Wahee'n daboch dala hay,

Qabal is k,

Tumharay lautnay ka yeh irada,

Raeyga'n thahray,

Tumhari meherbani hay,

Na tum ab laut k aana..!

No comments:

Post a Comment