Thursday, June 21, 2018

Chalo Ek Aisi Nazam Likhoon

Chalo ek aisi nazam likhoon
Jo lafz likhoon woh hojaye
Bas "Ashk" likhoon to ansoo
Tere gorey gaal ko dho jaye
Mei "Aa" likhoon tu ajaye

Mei "Beth" likhoon tu aa bethe
Mere shane pe sar rakh ke 
Mei "Neend" likhoon tu so jaye

Mei kagaz pe tere "Hont" likhoon
Tere honton pe muskaan aajaye
Mei "Dil" likhoon tu dil thamey
Mei "Gum" likhoon wo "Kho" jaye

Tere "Haath" banaoo pencil se
Phir haath pe tere haath rakhoon
Kuch "Ulta Seedha" farz karoon
Kuch "Seedha Ulta" hojaye

Mei "Aah" likhoon tu "Haye" kare
"Bechain" likhoon bechain ho tu
Phir mei "Bechain" ka "Be" katoon
Tujhe "Chain" zara sa ho jaye

Abhi "Ain" likhoon tu soche mujhe
Phir "Sheen" likhoon teri neend urey
Jab "Kaf" likhoon tujhe kuch kuch ho
Mei "Ishq" likhoon tujhe hojaye